कोल्हापुरी चप्पल टाकणार ग्लोबल ‘पाऊल’!

कोल्हापुरी चप्पल टाकणार ग्लोबल ‘पाऊल’!

कोल्हापूर : महाराष्ट्राची शान आणि 'रुबाबदार' अशा कोल्हापुरी चपलेला आता आंतरराष्ट्रीय बाजारपेठेत स्थान आणि मान मिळवून देण्याचा महाराष्ट्र राज्य खादी आणि ग्रामोद्योग मंडळाचा प्रयत्न आहे. पारंपारिक आणि मूळ सौंदर्य ही वैशिष्ट्ये जपत चपलेचा 'मेकओव्हर' केला जाणार आहे. त्यानंतर बाजारपेठांमध्ये कलात्मक कोल्हापुरी या ब्रँडने तिची विक्री केली जाणार आहे.

खादी आणि ग्रामोद्योग मंडळाने कोल्हापूरच्या कारागीरांसाठी खास कार्यशाळेचे आयोजन केले आहे. त्यात पॅरिसमधील डिझायनर नेओना स्काने या मार्गदर्शन करतील. कोल्हापुरी चपलेला आंतरराष्ट्रीय बाजारात स्थान मिळवून देण्यासाठी पहिल्यांदाच अशा प्रकारची कार्यशाळा घेण्यात येणार आहे. त्यासाठी स्थानिक व्यापारी, कारागीर, तज्ज्ञांसह 'बाटा' आणि अन्य प्रसिद्ध पादत्राणे कंपन्यांचीही मदत घेतली जाणार आहे. ही कार्यशाळा डिसेंबरमध्ये घेण्यात येईल, अशी माहिती मंडळाच्या कार्यकारी अधिकारी रिचा बागला यांनी दिली.

कोल्हापुरी चपलेने आपले वैशिष्ट्य टिकवून ठेवले असले तरी काळानुरुप या व्यवसायाला फटका बसत असल्याचे दिसते. त्यामागील कारणे या कार्यशाळेतून जाणून घेतली जाणार आहेत. पारंपरिक आणि मूळ सौंदर्य जपून कोल्हापुरी चपलेचे रुप बदलण्याचा निर्णय मंडळाने घेतला आहे. या चपलेला भारतीय आणि आंतराराष्ट्रीय बाजारपेठेत स्थान मिळवून देण्याचा प्रयत्न आहे, असेही बागला यांनी सांगितले. कलात्मक कोल्हापुरी या नावाने या चपलेची विक्री करण्यात येणार आहे. या कार्यशाळेचा एक भाग म्हणून डिझायनर स्काने या कोल्हापूरमधील गावागावांत जाऊन कारागीरांच्या भेटी घेतील. त्यांच्याशी संवाद साधून त्यांना चपला तयार करण्याच्या आधुनिक तंत्राबाबत माहिती देतील.