आयसीआयसीआय बँकेच्या कोचर यांचा राजीनामा

आयसीआयसीआय बँकेच्या कोचर यांचा राजीनामा

आयसीआयसीआय बँकेच्या सीईओ चंदा कोचर यांनी सीईओपदाचा तात्काळ प्रभावाने राजीनामा दिला आहे. त्यांचा राजीनामा मंजूर करण्यात आला असून त्यांच्या जागी नवे व्यवस्थापकीय संचालक आणि मुख्य कार्यकारी अधिकारी म्हणून संदीप बक्षी यांची निवड करण्यात आली आहे. बक्षी यांची नियुक्ती ५ वर्षांसाठी करण्यात आली असून ३ ऑक्टोबर २०२३ पर्यंत ते या पदावर कार्यरत राहणार आहेत. विशेष म्हणजे कोचर यांनी राजीनामा दिल्याची खबर येताच आयसीआयसीआय बँकेचे शेअर ५ टक्क्यांनी वधारले आहेत. व्हिडीओकॉन समूहाला दिलेल्या वादग्रस्त कर्जप्रकरणाची चौकशी पूर्ण होईपर्यंत चंदा कोचर यांना बँकेने सक्तीच्या रजेवर पाठवले होते. त्यांच्या जागी संदीप बक्षी यांची नियुक्ती करण्यात आली होती. बक्षी यांच्याकडे त्याआधी आयसीआयसीआय प्रुडेन्शियल लाइफ इन्शुरन्सच्या व्यवस्थापकीय संचालकपदाची जबाबदारी होती. आता कोचर यांनी राजीनामा दिल्याने त्यांच्यावर नवी जबाबदारी सोपवण्यात आली आहे. 

कोचर यांचे पती दीपक कोचर यांच्याशी संबंधित न्यू पॉवर रीन्यूएबल्स या कंपनीत व्हिडीओकॉन समूहाचे अध्यक्ष वेणुगोपाल धूत यांनी ६४ कोटी रुपयांची गुंतवणूक केली. त्या बदल्यात आयसीआयसीआय बँकेने व्हिडीओकॉन समूहाला ३,२५० कोटी रुपयांचे कर्ज दिले, असा आरोप आहे. या प्रकरणी केंद्रीय अन्वेषण विभागाने चौकशी सुरू केलेली असल्याने कोचर यांना पदावरून हटवण्यात आल्याचं सूत्रांनी सांगितलं.