साडेचार लाखांत थेट TYBSc प्रवेश

 साडेचार लाखांत थेट TYBSc प्रवेश

मुंबई विद्यापीठाच्या इंजिनीअरिंग शाखेच्या 'बनावट पत्रा'ने परीक्षा विभागाची झोप उडविली असतानाच विद्यापीठाशी संलग्न असलेल्या खडवली येथील जे. के. एस. कॉलेज ऑफ आर्ट, कॉमर्स आणि सायन्समध्ये साडेचार लाख रुपये मोजून थेट टीवायबीएससीसाठी प्रवेश दिले गेल्याची धक्कादायक माहिती 'मटा'च्या हाती लागली आहे. हा सर्व प्रकार विद्यापीठाच्या परीक्षा विभागातील कर्मचाऱ्यांच्या संगनमताने केला गेला असून, यात विद्यापीठाच्या 'एमकेसीएल'तील एका माजी कर्मचाऱ्यांचाही समावेश आहे. 

जे. के. एस कॉलेजमधील या गैरप्रकाराच्या तपासासाठी विद्यापीठातर्फे त्रिसदस्यीय समितीही नेमण्यात आली होती. या समितीच्या अहवालानंतर वरील प्रकार उजेडात आला. अशा प्रकारे कॉलेजतर्फे आतापर्यंत जवळपास २५ विद्यार्थ्यांना प्रवेश देण्यात आल्याचे परीक्षा विभागातील सूत्रांकडून सांगण्यात आले. हे प्रवेश देताना कॉलेजतर्फे प्रत्येक विद्यार्थ्यामागे साडेचार ते तीन लाख रुपये आकारण्यात आले. ही रक्कम भरल्यानंतर या विद्यार्थ्यांना प्रथम आणि द्वितीय वर्षाला प्रवेश न देता थेट बीएससीच्या अखेरच्या वर्षात प्रवेश दिले जात होते. हे करताना विद्यापीठाच्या परीक्षा विभागातील काही कर्मचाऱ्यांची मदत घेतली जात होती. हे कर्मचारी या विद्यार्थ्यांच्या प्रथम आणि द्वितीय अभ्यासक्रमांच्या बनावट गुणपत्रिका तयार करून देत. त्यानंतर प्रवेशासाठी अर्ज करून या विद्यार्थ्यांचे प्रवेश कॉलेजांना नियमित करून देण्यात येत होते.