आता ‘नीट’ वर्षातून एकदाच; ऑनलाइन परीक्षा नाही

 आता ‘नीट’ वर्षातून एकदाच; ऑनलाइन परीक्षा नाही

केंद्रीय माध्यमिक शिक्षण मंडळातर्फे वैद्यकीय पदवी अभ्यासक्रमाच्या प्रवेशासाठी घेण्यात येणाऱ्या नीट परीक्षेवरून केंद्रीय मनुष्यबळ विकास मंत्रालयाने पुन्हा एकदा यू-टर्न घेतला आहे. आता नीटची परीक्षा वर्षातून एकदाच घेण्यात येणार असल्याचं जाहीर करतानाच ही परीक्षा ऑनलाइन होणार नसून विद्यार्थ्यांना लेखी परीक्षा द्यावी लागणार असल्याचं मनुष्यबळ विकास मंत्रालयाने स्पष्ट केलं आहे. विशेष म्हणजे केंद्रीय आरोग्य मंत्रालयाच्या सूचनेनंतर मनुष्यबळ विकास मंत्रालयाने हा निर्णय फिरवला आहे. 

नॅशनल टेस्टिंग एजन्सी (एनटीए) मार्फत नीटसहीत जेईई मेन्स, नेट, सीमॅट, जीपॅटच्या परीक्षा घेण्यात येणार आहेत. एनटीएने डिसेंबर २०१८ ते मे २०१९ दरम्यान होणाऱ्या या परीक्षांच्या तारखाही जाहीर केल्या आहेत. त्यानुसार यंदा नेटची परीक्षा ९ डिसेंबर ते २३ डिसेंबर दरम्यान होईल. त्यानंतर १० जानेवारी रोजी नेटचा निकाल घोषित केला जाईल. जेईई मेन्स-१ ची परीक्षा पुढच्या वर्षी ६ ते २० जानेवारी दरम्यान होणार असून त्याचा निकाल ३१ जानेवारीला जाहीर करण्यात येणार आहे. जेईई मेन्स-२ चा निकालही ६ ते २० एप्रिल दरम्यान होणार असून त्याचा निकाल ३० एप्रिल रोजी जाहीर करण्यात येणार आहे.