पृथ्वीच्या ‘शॉ’नदार शतकामुळे भारत ४ बाद ३६४

पृथ्वीच्या ‘शॉ’नदार शतकामुळे भारत ४ बाद ३६४

कसोटी पदार्पणातच सलामीवीर पृथ्वी शॉने केलेली १३४ धावांची खणखणीत शतकी खेळी तसेच चेतेश्वर पुजारा (८४ धावा) व कर्णधार विराट कोहलीच्या (नाबाद ७२ धावा) अर्धशतकी खेळीच्या जोरावर भारताने वेस्ट इंडिजविरुद्धच्या दोन कसोटी सामन्यांच्या मालिकेतील पहिल्या सामन्यात पहिल्या दिवशी ४ बाद ३६४ धावांची दमदार मजल मारली आहे. पृथ्वी शॉची सुरेख शतकी खेळी हे आजच्या खेळाचे आकर्षण ठरले. पृथ्वीने आक्रमक खेळ करत ९९ चेंडूत आपले पहिले शतक पूर्ण केले. १५४ चेंडूत १३४ धावा करून पृथ्वी बाद झाला. १८ वर्षे आणि ३२९ दिवस इतकं वय असलेला पृथ्वी भारताकडून कसोटी पदार्पणातच शतक झळकावणारा दुसरा सर्वात युवा फलंदाज ठरला आहे. मास्टर ब्लास्टर सचिन तेंडुलकरने १७ वर्षे आणि ११२ दिवस इतकं वय असताना कसोटी शतक झळकावलं होतं. 

नाणेफेक जिंकून प्रथम फलंदाजी करणाऱ्या भारताला पहिल्याच षटकात झटका बसला. सलामीवीर लोकेश राहुल खाते न खोलता बाद झाला. त्यानंतर पृथ्वी शॉ आणि चेतेश्वर पुजारा या जोडीने २०६ धावांची भागिदारी रचून भारतीय डावाला आकार दिला. पुजाराने कसोटी कारकीर्दीतील ६३वे अर्धशतक झळकावले. भारताची धावसंख्या २०९ असताना पुजारा बाद झाला तर त्यानंतर २३२ धावांवर पृथ्वीच्या रूपाने भारताला तिसरा धक्का बसला. त्यानंतर अजिंक्य रहाणे आणि विराट कोहलीने अधिक पडझड होऊ न देता संयमी खेळ करून भारताला ३०० पार नेले. या जोडीने १०५ धावांची भर घातली. त्यानंतर रहाणे ४१ धावा करून बाद झाला. दुसरीकडे विराटने आपले विसावे अर्धशतक झळकावले. दिवसअखेर भारताच्या ४ बाद ३६४ धावा झाल्या असून विराट ७२ धावा करून तर ऋषभ पंत १७ धावा करून खेळत आहेत. भारताला आता मोठी धावसंख्या उभारून पाहुण्या विंडीजवर दबाव टाकण्याची चांगली संधी आहे.